Kamari hjá dóttrini er yvirtykið, og tað saman er klædnarúmið, tí posar og sekkir standa allastaðni heima hjá Stefanie Trónd Larsdóttir, nú hon heitir á fólk um at koma við lutum til loppumarknað, ið skal vera í næstu viku.

- Eg vil bara fegin hjálpa teimum barnafamiljum ið hava tað trupult fíggjarliga, soleiðis at jólini hjá teimum ikki gerast ein so stressað tíð, har mest verður hugsað um at fáa endarnar at røkka saman og at fáa børnunum góðar jólagávu, sigur Stefanie.

Og líkt er til at onnur hava tað sum hon, tí hon hevur fingið nógv, ið kann seljast á loppumarknaði, umframt at fleiri listafólk hava latið listaverk til eina uppboðssølu, ið ætlanin er at hava síðsta dagin, loppumarknaðurin er.

Um onkur er, ið hevur lutir at lata, ber til at seta seg í samband við Stefanie via Facebook, ella at lesa meira um tiltakið á vanganum hjá Barnabata.