Fimta fløskan er framúr

01-10-2021

Fimta fløskan av Whisky, sum Einar's Distillery letur á marknaðin, fær best hugsandi skotsmál frá Jim Murray, sum síðani 2003 árliga hevur útgivið The Whisky Bible

The Whisky Bible er eitt dagført yvirlit og ummæli av fleiri enn 4500 ymiskum sløgum av whisky - og The Whisky Bible er seld í fleiri enn einari millión eintøkum. Tí er Jim Murray eisini millum mest viðurkendu whisky-ummælararnar, sum eru.

Hann hevur roynt fimtu fløskuna av whisky hjá Einar's Distillery, sum kemur út um eina viku, og gevur henni 94 stig av 100 møguligum. Hægsta stigini, hann nakrantíð hevur latið, eru 97,5, og tí ber til at siga, at lítla fløskan við grøna spjaldrinum valla kundi fingið betri karakter.

Einar Waag fekk boðini mánadagin. Týsdagin vitjaði morgunsendingin í Klaksvík, tá Sebastian Eriksen, blendari og goymsluleiðari á Einar's Distillery, lat góðu droparnar á fløsku.

Góðan morgun Føroyar

Góðan morgun Føroyar er á skránni gerandismorgnar frá klokkan 7:35 til 9:50. Sendingin loftar aktuellum evnum, hevur fastar tættir og leggur upp til interaktivitet. Alt er kryddað við tónleiki, nýggjum og eldri. Samband: gmf@kvf.fo, telefonnummar +298 347500 Góðan morgun Føroyar á Facebook (letur upp í nýggjum kaga)