Tá starvsfólk á teimum trimum sjúkrahúsunum fara til arbeiðis eftir nýggjár, skulu tey venja seg við roykibann í arbeiðstíðini.

Leiðslan fyri sjúkrahúsini í Klaksvík, Suðuroy og í Tórshavn hevur tikið stig til at seta roykiforboð í verk.

Frá 1. januar 2021 er ikki longur loyvt starvsfólkum í sjúkrahúsverkinum at roykja, meðan tey eru til arbeiðis. Heldur ikki tá tey halda steðg.

- Vit eru eitt sjúkrahús, og vit eiga at ganga á odda, tá tað snýr seg um heilsuframjan, sigur Alexandra á Dul, stjóri fyri sjúkrahúsverkið.

Hon dylir tó ikki fyri, at reaktiónirnar frá starvsfólkunum hava verið ymiskar.

- Tað er sera ymiskt, hvussu starvsfólkini hava móttikið tíðindini um roykiforboðið, men sum heild haldi eg, at fleiri eru glað fyri tað og skilja avgerðina, sigur Alexandra á Dul.

Í morgunsendingini greiddi hon frá roykiforboðnum, og hvussu tað skal roynast í verki.