Tað byrjaði í 1969 í einum lítlum goymslurúmi.

Tað var bókasavnið tá. Eingi vindeygu, fáir fermetrar og lutfallsliga fáar bøkur.

Í dag meira enn 50 ár seinni er støðan ein onnur.

- Í dag hava vit eitt framkomið bókasavn í Tofta skúla við bókum á fleiri málum, ymiskum tíðarritum og í góðum hølum, sigur Josefina Jacobsen. Hon er ein av teimum, sum hevur verið í bókasavnsnevndini líka frá byrjan av.

Herfyri varð skipað fyri hátíðarhaldi á bókasavninum á toftum í sambandi við at bókasavnið á Toftum í 2019 hevði 50 ára stovningardag. Dagurin bleiv tó av ymsum orsøkum ikki hildin fyrr enn í september í ár.

Til hátíðarhaldið varð eisni heiðursløta fyri Josefinu Jacobsen.

Í morgunsendingini greiðir Josefina Jacobsen frá menningini, sum er farin fram hesi 50 árini, bókasavnið á Toftum hevur á baki.