Næstan liðugt at talgilda gomlu bondini

13-10-2021

Nú er um at vera liðugt at talgilda gomlu útvarps- og sjónvarpsbondini hjá Kringvarpinum, og tað merkir, at meginparturin av gamla savnstilfarinum nú er bjargað

Seinastu sjey árini hevur verið arbeitt við at fáa øll tey gomlu bondini í kringvarpssavninum talgildað, og hetta arbeiðið er nú um at vera komið á mál.

Undir verkætlanini, Savnsgull, var á sumri 2014 farið í holt við at talgilda alt skjalatilfarið og tey gomlu útvarps- og sjónvarpsbondini, sum annars høvdu verið í vanda fyri at farið fyri skeytið.

Summi bond eru so gomul, at tað hevur verið neyðugt at fara uttanlands at talgilda tey, og hesi árini eru seks túrar gjørdar til Belgia at talgilda bond.

- Seinasti túrurin var síðst í september, greiðir Mass Hoydal, verkætlanarleiðari á Savnsgulli, frá.

Savnandi savnsdagur

29. oktober verður eitt tiltak í kringvarpshøllini, sum Savnsgull hevur tikið stig til.

Heitið á tiltakinum er Savnandi Savnsdagur og er fyri øll, sum hava áhuga í at læra meira um, hvørjum søvnini í Føroyum arbeiða við.

Savnandi Savnsdagurin verður 29. oktober kl. 13-16 í forhøllini í Kringvarpi Føroya.

Góðan morgun Føroyar

Góðan morgun Føroyar er á skránni gerandismorgnar frá klokkan 7:35 til 9:50. Sendingin loftar aktuellum evnum, hevur fastar tættir og leggur upp til interaktivitet. Alt er kryddað við tónleiki, nýggjum og eldri. Samband: gmf@kvf.fo, telefonnummar +298 347500 Góðan morgun Føroyar á Facebook (letur upp í nýggjum kaga)