Tá ið Eir í Ólavsstovu gekk í miðnámsskúla í Hoydølum, kom hon at kenna listakvinnuna Elina Josefinu Smith. Tær blivu vinkonur, men brádliga ein dagin fekk Elin sálarsjúku. Hon gavst í skúlanum og flutti til Danmarkar. Vinfólkini fingu ongantíð at vita, hvat veruliga hendi.

- Heimildarfilmurin er ein rannsóknarferð aftur í tíð, har vit skulu fáa greiðu á, hvat veruliga hendi Elini, sigur Eir í Ólavsstovu, sum hevur framleitt heimildarfilmin.

Á ferðini kemur fram, hvussu stórt tabu sálarsjúka var fyri 40 árum síðani, og hvussu tøgnin og manglandi vitanin um sálarsjúku, var við til at oyðileggja lívið hjá einari ungari gentu. Hóast filmurin er beiskur í støðum, so hendir tað gleðiliga, at vit síggja, hvussu Elin sum frá líður fær vaksandi álit á mammu sína, og vreiðin, sum Elin hevur følt øll hesi árini, byrjar at hvørva.

Sjónvarpsdokumentarurin verður vístur í kvøld eftir Dag og Viku.