Kelidjór blíva útblakað

10-11-2021

- Tað er ikki heilt óvanligt, at kelidjór bara verða slept út í náttúruna, tí eigararnir ikki tíma tey meir, sigur Djóraverndarfelagið.

Kettlingar. Kaninir. Marsvín.

Hetta eru aloftast tey djórini, sum verða funnin úti í náttúruni og ofta illa fyri.

- Vit uppliva viðhvørt, at fólk bara sleppa kelidjóri sínum út í náttúruna, tí tey tíma ikki at hava djórið longur. Tað hendir ikki ofta, men av og á, sigur Diana Krossá Kongsbak frá Djóraverndarfelagnum.

Fyrr í vikuni legði Djóraverndarfelagið mynd út á Facebook. Á myndini vóru tvey marsvín, sum fólk høvdu funnið úti í náttúruni.

- Tíbetur høvdu tey ikki ligið so leingi og stóðu tí til at bjarga. Harafturat hava vit funnið teimum eitt gott heim, sigur Diana Krossá Kongsbak.

Í morgunsendingini fortelur hon um týdningin av, at fók sleppa sær av við kelidjór á rættan hátt, tá tey ikki longur tíma ella kunnu hava tað.

Góðan morgun Føroyar

Góðan morgun Føroyar er á skránni gerandismorgnar frá klokkan 7:35 til 9:50. Sendingin loftar aktuellum evnum, hevur fastar tættir og leggur upp til interaktivitet. Alt er kryddað við tónleiki, nýggjum og eldri. Samband: gmf@kvf.fo, telefonnummar +298 347500 Góðan morgun Føroyar á Facebook (letur upp í nýggjum kaga)