- Tíðindi, mentan og ítróttur
Góðan morgun Føroyar
Ragnar Finnsson, sum í tónleikahøpi nevnist Horrse, er fyri stuttum komin aftur av ferð í Norra. Har hevur hann spælt sangir úr nýggju EP'ini, Crossing, og eisini verið við í fleiri norskum sendingum. Framførslan á norska TV2 sæst á hesum leinki.
- Næstu trý árini leggi eg alla orku í at etablera meg í tónleikinum, sigur Ragnar Finsson. Í fyrstu atløgu leggur hann dent á grannalondini.
Hann var níggju ára gamal, fyrstu ferð hann royndi seg á gittarinum. Tað kendist beinanveg rætt.
Ragnar Finsson treivst als ikki í skúlanum tá, tað hevur hann ongantíð gjørt, og tí var gittarin eitt slag av eini bjarging.
Fyrstu tíðina var hann als ikki áhugaður í nakrari frálæru. Hann spældi bara frítt og lærdi ljóðførið at kenna.
Í dag ásannar hann, at tað er ein framíhjárættur at vera uppvaksin í einum heimi, har tónleikurin fyllir so nógv.
Bæði mamman og pápin, Malan Thomsen og Finnur Hansen, hava verið virkin í tónleikinum alt tað Ragnar minnist.