Merkið hevur fingið navnið 'Ein hjálpandi hond', ið er eitt sjálvboðið hjálparmerki, sum fólk við demensi kunnu nýta, tá tey ferðast í almenna rúminum.

- Tey, ið eru rakt av demensi, eru samstundis partur av samfelagnum, og tey hava sín gerandisdag millum okkum onnur. Men tað kann vera trupult hjá øðrum at síggja, at hesi hava tørv á einari hjálpandi hond, sigur Ann Mari Jensen, forkvinna í Alzheimerfelagnum.

- Summi gerast ørkymlað, tí tey ikki finna heim, meðan onnur hava brúk fyri einum sindri av toli, tá tey til dømis skulu nýta gjaldskort í einum handli. Nú hava tey møguleika at seta eina brosju á jakkan ella eitt klistrimerki á gjaldskortið, sum sigur umheiminum, hvørjari støðu tey eru í, leggur hon afturat.

Sigrun Mohr er avvarandi hjá demensraktum, og eisini tey taka væl ímóti hesum merki, tí tey merkja avgjørt, at tørvur er á, at fólk við demensi gerast meira sjónlig í samfelagnum.

- Summi fólk við demensi hava lyndi til at fara út, og kanska villast, so um tú hittir ein persón við hesum merki, kanst tú fara til teirra og spyrja, um tey hava tørv á einari hjálpandi hond.

Tey, sum ynskja at fáa eitt tílíkt merki, kunnu venda sær til Alzheimerfelagið.