- Tíðindi, mentan og ítróttur
Góðan morgun Føroyar
Ársins orð er sammóðir, men um hugt verður í orðabøkurnar á heimasíðuni, sprotin.fo, er orðið ikki at finna í øllum orðabókum. Til dømis er orðið ikki komið í móðurmálsorðabókina á netinum. Orsøkin er tøknilig, sigur ritstjórin á orðabókini.
Fleiri hava gjørt vart við, at sammóðir, sum er ársins orð, ikki er finna á Sprotanum. Tað er tó ikki heilt rætt, tí orðið er í summum av orðabókunum, sum liggja á heimasíðuni sprotin.fo. Eitt nú í orðabókunum, sum Sprotin eigur. Tær orðabøkurnar eru FO-EN, EN-FO og DK-FO.
Hinvegin er orðið ikki at finna í FØ-FØ ella móðurmálsorðabókini, sum orðabókagrunnurin hevur ábyrgdina av. Ritstjóri á móðurmálsorðabókini er Jógvan í Lon Jacobsen, professari í føroyskum, og hann sigur, at orsøkina finna vit í orðabókaforritinum.
Nýtt forrit á veg
Sprotin.fo er ein orðabókaportalur, har allar orðabøkurnar eru savnaðar á einum og sama stað.
Har eru bæði ymiskir eigarar og ymisk tøkni knýtt at ymsu orðabókunum, og tí kunnu brúkarar uppliva, at summar orðabøkur hava ávís orð, meðan aðrar ikki hava tey á netinum. Og tað er sostatt tað, sum ger seg galdandi við til dømis orðinum, sammmóðir.
Men arbeiðið við at dagføra orðabókaforritið í Móðurmálsorðabókini er í gongd, sigur Jógvan í Lon Jacobsen, ritstjóri á Móðurmálsorðabókini.