Einaferð var Norðlýsið eitt fiskiskip, sum var um at falla í órøkt, men eftir at Tróndur Patursson fekk hendur á tað, og nógv gott fólk traðkaði til sum tíðin leið, siglir hon nú kring oyggjarnar í besta formi, við sínum eyðkendu reyðu seglum.

Sjálvt um Norðlýsið verður rikið á einum handilsligum grundarlagi, so skal tað at fáa eina hýru ikki vera grundarlagið hjá teimum, sum manna skipið, sum nú leitar eftir manning.

- Tú fært eina samsýning, men hetta er ikki eitt fulltíðarstarv; als ikki, sigur Frank Djurhuus Jakobsen, útgerðarmaður, og heldur fram, at hetta heldur er sum eitt frítíðarítriv, har denturin er lagdur á at hugna um tey, ið koma umborð, samstundis sum man ger nakað, man dámar.