Hví varð 16 ára gamla Maria Fuglø Christiansen funnin druknað við byrgingina í Hvannasundi í 2012?

Tann spurningurin hevur verið afturvendandi hjá mongum seinastu 10 árini.

Ikki bara millum avvarðandi og løgregluna, sum í tveimum førum gravaði málið fram aftur.

Tí eisini TV2 hevur granskað í málinum í trý ár, og úrslitið er dokumentarrøðin "Druknet", sum varð send í TV2 og Kringvarpinum í gjárkvøldið.

Føroysku miðlarnir manglaðu

Men spyrt tú ein av berandi kreftunum aftan fyri TV2-dokumentarin "Druknet", so mangla nakrir aktørar - føroysku miðlarnir.

- Tá eg kom til Føroya, var tað sum at traðka á oyðimold, tí eingin gav hesum máli ans, sigur Anders Lomholt, journalistur og vertur í dokumentarrøðini.

Hann leggur afturat: 

 - Jú, fólk, serliga norðanfyri, kendu søguna, og tey royndu at finna útav, hvat vendi upp og niður; men miðlarnir høvdu næstan ikki nortið við søguna – einans á einum grunnum tíðindagrundarlagi.

Sonevnda Hvannasundsmálið hevur sambært journalistinum alt tað, ein góð journalistisk søga skal hava.

 - Ein slík søga hevði í Danmark fingið fullan dekning í bløðum, útvarpi og sjónvarpi. Ivaleyst høvdu fleiri sendingar verið gjørdar og longri greinar skrivaðar; men tá vit komu til Føroya, funnu vit einki tilfar um málið, og eingin hevði tosað við tey avvarðandi, sigur Anders Lomholt.