Tá Fótbóltssamband Føroya skipar fyri landsdystum og øðrum stórum tiltøkum, er trygdin av alstórum týdningi.

Tí hevur trygdarovastin í Fótbóltssambandi Føroya, Terji Nielsen, nú fingið ta hægstu útbúgvingina av sínum slagi í norðurlondum - trygdarovasti A+.

Talan er um eina lutfallsliga nýggja útbúgving, og í danska kongaríkinum eru bara 25 fólk, sum hava hana. Terji Nielsen er tann einasti í Føroyum, ið hevur útbúgvingina, sum fyrst og fremst er ætlað at brúka í fótbóltshøpi.

- Hetta snýr seg um trygd í sambandi við alt tað, sum hendir áðrenn, ímeðan og aftan á ein fótbóltsdyst ella onnur tiltøk, tá nógv fólk savnast. Hvussu tú kanst fyribyrgja møguligar vandastøður, og hvussu tú so handfer eina slíka støðu, um hon hendir, sigur Terji Nielsen.

Í morgunsendingini greiðir Terji Nielsen frá útbúgvingini og stórum fótbóltsdystum, tá hann hevur evstu ábyrgd fyri trygdini.