- Tíðindi, mentan og ítróttur
Góðan morgun Føroyar
Glaðari Þu! er ein háttur at lokka fólk at dyppa í felag. Tá tey hittast, hita limirnir væl upp, áðrenn farið verður útí - syngjandi ein barnasang, fyri at andadrátturin skal vera rættur. Eftir at fáu tøkini eru tikin í sjónum, fara tey upp aftur, tendra Harry Belafonte í boomboxini og dansa seg heit aftur.
Nú hevur ein flokkur av hesum glaðu íslendsku dypparum verið í Føroyum á rannsóknarferð, har tær millum annað hava vitjað dyppararnar í vinafelagnum Alduni í Miðvági, og ikki minst hava tær dyppað við Miu á Heygum.
- Mia er ein hetja um allan heimin, og tað var fantastiskt at sleppa at dyppa saman við henni, tí hon er tað, sum vit øll ynskja at vera, sigur Margrét Leifsdóttir, ið er ein av teimum, ið varar av Glaðari Þu!
Ein annar limur í Glaðari Þu! er føroyska sendikvinnan í Íslandi, Halla Nolsøe Poulsen, og var tað ikki fyri felagnum, hevði hon kanska ongantíð torað at dyppa.
- Eg havi ofta hugsað um at fara at dyppa her heima í Føroyum, men eg hættaði mær ikki. Tá eg so í heyst sá eina lýsing á facebook, har Glaðari Þu! lýsti við, at tey læra fólk at dyppa, ja so hugsaði eg, at nú var møguleikin har.