- Tíðindi, mentan og ítróttur
Góðan morgun Føroyar
Mong kenna tað aftur at sita á laboratoriinum á Landssjúkrahúsinum og bíða eftir at taka blóðroynd. Viðhvørt hevur løtan verið drúgv.
Í juli varð nýggj bíleggingarskipan tikin í nýtslu, so nú kanst tú sita við hús og biða tær tíð til blóðroynd ella EKG á rannsóknarstovuni á Landssjúkrahúsinum.
- Skipanin gevur fólki møguleika at bíleggja sær eina tíð, sum passar teimum, og so sleppa tey undan at bíða í hálvan til ein tíma, eftir at sleppa fram at, sigur Birita Kristoffursdóttir Samuelsen, leiðandi bioanalýtikari á Rannsóknarstovuni.
Bílegging fer fram á sama hátt, sum nýtt var til koppseting og koronukanningar. Hon er skipað soleiðis, at tá ein hevur bílagt sær tíð í skipanini, verður eitt bókingarnummar sent við SMS. Tá komið verður á LS at taka blóðroynd, skal ein skráseta seg við bíleggingarnummarinum á einum skermi, sum stendur við inngongdina til blóðroyndarhølið.
Birita Kristoffursdóttir Samuelsen, leiðandi bioanalýtikari á Rannsóknarstovuni, við nýggju bíleggingarskipanina
Ber eisini til at koma til blóðroynd uttan at bíleggja sær tíð
- Tað ber sjálvandi eisini til at møta upp sum áður, uttan at hava bílagt sær tíð, og taka sær eitt nummar og seta seg at bíða, sigur Birita.
Av tí at skipanin hevur verið roynarkoyrd síðan juli, hava tey ikki reklamera so nógv fyri henni, men nú er ætlanin at fáa fleiri og fleiri fólk at brúka hana.
- Hon hevur riggað væl, tó so, tað kunnu enn verða onkrar barnasjúkur, sigur Birita Kristoffursdóttir Samuelsen, leiðandi bioanalýtikari á Rannsóknarstovuni.
Leinki at bíleggja sær tíð til blóðroynd
Nýggja bíleggingarskipanin uttanfyri nýggju bíðuhølini til blóðroyndir og EKG. (Mynd: LS)
Flutt aftur í høvuðsbygningin á LS
Leggjast kann afturat, at blóðroyndirnar verða nú tiknar í høvuðsbygninginum á Landssjúkrahúsinum, í nýggjum stásiligum hølum til høgru fyri leiðbeiningina í forhøllini og ikki longur í bláa bygninginum hinumegin vegin. Flutt var inn í nýggju hølini í vár.
Lurta eftir samrøðuni við Birita Kristoffursdóttir Samuelsen.
Meira kunning fæst HER