Umhvørvið hevur altið ligið frammaliga í huganum hjá Ólavi Poulsen, sum bæði hevur verið virkin í FNU og hevur sítt egna vatnorkuverk við hús.

- Vit hava skyldu til at gera tað vit kunnu, fyri at royna at geva eina liviliga verð til okkara eftirkomarar, so tey ikki brigsla okkum fyri bara at brúka og brúka, sigur hann.

Ólavur setti fyrsta verkið upp í 2014, men sá skjótt, at tað ikki gagnnýtti orkuna í nóg stóran mun, so fýra ár seinni keypti hann eitt størri, sum nú letur streym til húsið umframt nóg nógva orku til fýra hús á netinum hjá SEV. Verkið er, sum tað einasta privata, knýtt í netið hjá SEV, soleiðis at tann orkan, ið Ólavur ikki nýtir, verður gagnnýtt har í staðin fyri at fara burtur.