- Tíðindi, mentan og ítróttur
Góðan morgun Føroyar
At geva heldur enn at fáa. Hetta er í stóran mun hugsjónin, sum Rebekka Dahl Thomsen hevur livað eftir, síðani hon í 2016 gavst við universitetslestrinum.
- Um eg selji meir enn onkur annar, er eitt sindur líkamikið hugsaði hon.
Í løtuni er hon í Nepal, har hon undirvísir í yoga. Men eisini hevur Rebekka eitt stórt hjartamál - at hjálpa børnum, sum eru komin illa fyri.
Í Nepal er støðan tann, at um fólk, ið eiga børn, skulu í fongsul, verða børnini send við, um eingin í familjuni kann taka sær av teimum.
Tað hevur havt nógvar syrgiligar lagnur við sær.
Í dag er ein felagsskapur, sum hjálpir hesum børnum. Tíggju hús eru kring alt Nepal, har børnini kunnu búgva og fáa eina góða tilveru. Tey ganga í skúla og fáa útbúgvingar.
Rebekka Dahl Thomsen hevur sjálv sæð, hvønn mun hesin felagsskapurin kann gera. Tí heitir hon nú á føroyingar, sum hava hug og møguleika til tess, at veita eina hjálpandi hond.
Ein møguleiki er at gjalda eina upphædd og síðani fara eina mánað til Nepal at arbeiða á einum heimi.
- Hetta er ikki fyri øll, viðgongur Rebekka Dahl Thomsen. Her gera øll alt saman. Fólk liva og virka í felag. Tó er hetta ein frálíkur møguleiki hjá teimum, ið vilja fáa eitt annað sjónarhorn og eisini læra at virðismeta tað, sum vit hava í Føroyum.
Umstøðurnar eru góðar og tryggar, og fólkini eru ikki bara góð við børnini, tey eru eisini ógvuliga góð við tey vitjandi.
Á hesum leinki ber til at kunna seg meira um møguleikar at stuðla arbeiðinum í Nepal.