- Vit uppliva, at foreldur hava brúk fyri hjálp og vegleiðing eisini uttan fyri okkara vanligu arbeiðstíð, og tí vilja vit nú gera eina roynd at veita ráðgeving um vikuskiftið.

Soleiðis sigur Sólrun Foldbo, sum er fakligur stjóri á Gigni.

Síðani 1. september hevur Gigni bjóðað telefonráðgeving um bróstageving og annað, sum hevur við pinkubørn at gera.

- Tørvurin er heilt avgjørt til staðar, tí vit síggja í okkara arbeiði, at serliga í sambandi við bróstageving er tað av stórum týdningi, at foreldur fáa góð ráð og hjálp, so skjótt ein trupulleiki stingur seg upp. Tað vísir seg, at ein lítil avbjóðing kann blíva til ein stóran trupulleika, um tú ikki fært røttu ráðgevingina rættstundis, sigur Durita Restorff, sum er heilsufrøðingur og serútbúgvin í bróstageving.

Í morgunsendingini fortelja tær báðar um nýggja tilboðið.