Føroyskt sum annað mál er ein útbúgving, sum nú ber til at taka í miðnámsskúlanum á Kambsdali. Byrjað verður um mánaðarskiftið, og til ber at søkja nú.

Tað hevur leingi verið eitt ynski hjá tilflytarum í eystur- og norðurøkinum at sleppa at taka útbúgvingina nærri heiminum, tí til nú hava tey verið noydd at leita sær til høvuðsstaðin í skúla.

- Í økinum eru nærum túsund tilflytarar, so tú kanst ætla, at tørvurin hevur verið til staðar, sigur David Im frá útlendingastovuni, sum saman við Óla Wolles, útbúgvingarleiðara á Kambsdali, vitjaði morgunsendingina.

Tilflytarar, sum koma til Føroya, hava við sær í skjáttuni sera ymiskar førleikar, tí summi hava ongantíð gingið í skúla, og onnur hava lært eitt heilt annað stavrað í heimlandinum, so tey byrja á berum. Onnur hava bæði miðnám og hægri útbúgvingar, men kunnu ikki nýta hesar, tí tey ikki duga føroyskt. Tí er útbúgvingin deild upp í trý, soleiðis at okkurt er til øll.

- Vit hava ikki roynt hetta áður, men eru sera spent at byrja. Lærarar hjá okkum hava nomið sær eftirútbúgving, soleiðis at teir eru til reiðar at taka ímóti teimum, sum skulu læra føroyskt sum annaðmál.

Til ber at søkja umvegis heimasíðuna kambsdalur.fo