Tað var ein ungur, Poul Michelsen, sum tá var í læru hjá Balslev, ið filmaði hendingina. 

- Eg helt ikki, at hesin filmurin var til longur, sigur Poul Michelsen. Upptøkan bleiv funnin í sambandi við, at nakrir gamlir spolar herfyri vóru talgildir.

Sakk inni í Havnini

Tað var í 17. februar í 1968, at ferðafólkaskipið Ritan sakk, eftir at hon var ásilgd av Ternuni uttan fyri molan í Havn. 

Ritan kom í flotan í 1949. Hon var bygd í Keypmannahavn og sigldi fyri tað mesta millum Sandoy, Nólsoy og Tórshavn.

Brúkt sum fiskiskip

Eftir hendingina var hon tikin upp og seld til Jan Bech á Skála. Hann umvældi hana til fiskiskip og gav henni navnið, Jónfríð. Seinni keypti Pálli Egilsnes í Vestmanna bátin og gav honum navnið Ritunøvan. Pálli fekk fiskiloyvi og trolaði á landleiðini í nøkur ár. Nakað seinni var skipið slitið, og Tjaldrið sleipaði Ritunøvuna eystur um Nólsoynna har hon var sokkin.