Hesir eru millum fyrimunirnar, um tú velur at gera tær ein vanga á e.fo, ið er eitt føroyskt horn í stóra Mastodon netverkinum. Tað er Ólavur Ellefsen, ið stendur aftan fyri e.fo, sum er nýggjasti sosiali miðilin, sum føroyingar kunnu velja at vera á.
Nýtslan av Mastodon platforminum tók veruliga dyk á seg, tá Elon Musk keypti sosiala miðilin Twitter og lovaði stórar broytingar har.

Sigast kann, at Mastodon er ein mótrørsla móti tí, sum teir mest nýttu sosialu miðlarnir standa fyri. Her eru millum annað ongar lýsingar at hóma, og eingin vinnur pening við at standa fyri einum slíkum miðli. Hann er open source, ið merkir, at øll kunnu útvega sær forritini og gera sær sín egna sosiala miðil við Mastodon, so leingi tú hevur ein ambætara til høvið.

- Tað, tú postar á e.fo er tað sama, sum tú postar aðrastaðni, sum til dømis meiningar, hugskot ella kritikk, alt eftir, hvat tú hevur hug til at legga út. Eg haldi, at tað minnir eitt sindur um kjak.fo, sum fleiri okkara minnast aftur á við gleði. Tað er eitt meira opið forum, har tú sleppur undan lýsingum og algoritmum, og tú sleppur at síggja alt tað, tú hevur hug til.

Umframt, at tað er gjørligt at koma á e.fo á telduni, ber eisini til at brúka miðilin umvegis eina Mastodon app, og har eru fleiri at velja ímillum. Har eru almenna Mastodon appin, umframt Metatext og Toot.