Í næstu viku koma fyrstu søgurnar frá Frihedsbrevet.fo til teirra, ið hava keypt sær atgongd, og blaðstjórin sær so avgjørt ein tørv á valdskritiskum og gravandi journalistikki.

Føroyska Frihedsbrevet.fo og danska Frihedsbrevet.dk eru systirfeløg undir einum felags móðurfelag, sum millum annað hevur føroyskar íleggjarar.

Spurd um hesir føroysku íleggjararnir fara at hava ávirkan á tilfarið, ið verður framleitt, lovar blaðstjórin, at eingin skal hava ávirkan.

- Vit hava við vilja ikki søkt um miðlastuðul, tí vit ynskja ikki at vera bundin at valdshavarunum.

Vit fara heldur ikki at hava lýsingar, so at vit skulu hugsa um tað.

Harumframt hava íleggjarar skrivað undir upp á, at tey onga ávirkan hava á tær søgur, vit koma við, sigur Barbara Holm.

Tey trý á føroysku redaktiónini, Barbara Holm, Jan Lamhauge og Rólant Waag Dam, fara at skriva greinar og gera poddvarp.

Umframt hesi eru eisini avtalur gjørdar við fríyrkisfólk.

Barbara Holm ásannar, at gongst tað væl, kundi hon avgjørt hugsað sær, at redaktiónin bleiv størri.

Tað er mín vón, at fólk vilja gjalda fyri okkara journalistikk, sigur ábyrgdarblaðstjórin.

Tað er fyritreytin fyri, at Frihedsbrevet er lív lagað í Føroyum.