- Tíðindi, mentan og ítróttur
Góðan morgun Føroyar
Í 2022 var triði hvør persónur, sum læt lív í ferðsluni í Norra, 65 ár ella eldri. Granskarar halda, at hetta kann vera eitt rák, ið fer at vinda upp á seg.
Torkel Bjørnskau, granskari á Transportøkonomisk Institut, vísir á, at fólk yvir 60 í Noregi eru vorðin munandi meiri múgvandi seinastu 10 árini.
Lutfalsliga eru nógv fleiri fólk eldri enn 65. Tað sæst aftur í ferðsluni.
Hetta er ein virkin bólkur, sum av tí sama koyrir nógvar kilometrar.
- Reaktiónsevnini hjá eldri fólki eru ikki eins góð og hjá teimum ungu. Tað kemur eitt nú til sjóndar, tá eldri førarar snara inn á høvuðsveg. Viðhvørt brúkar eldri førarin ov langa tíð at koma inn á vegin, og tá kann tað vera ov seint.
Vánalig sjón kann eisini hava við sær, at eldri førarar rætt og slætt ikki síggja aðrar bilar, sigur Bjørnskau.
Hann ger eisini vart við, at tað er nógv, sum bendir á, at framkomna tøknin, við stórum skíggjum og nógvum knøttum, kann vera ein meinbogi hjá eldri førarum.
Tey brúka nógva tíð støðugt at flyta sítt uppmerksemi frá vegnum og til skíggjarnar.
Framkomnar skipanir, ið hava til endamáls at gera tað lættari at koyra, kunnu í summum førum ørkymla føraran.