- Tíðindi, mentan og ítróttur
Góðan morgun Føroyar
Silas Olofson, fuglaáhugaður, var úti við myndatólinum fyri at avmynda hetta serliga hegraslag, og hann fann ein nátthegra (Nycticorax nycticorax) í viðarlundini í Hvalvík.
- Hann var rennvátur av regninum og tóktist ikki ordiliga at vera nøgdur við umstøðurnar, sigur Silas við einum brosi.
Nátthegri avmyndaður í viðarlundini í Hvalvík. (Mynd: Silas Olofson)
Vilstur til Føroya
Nátthegri heldur vanliga til í heitari londum, men nú láættin hevur ligið, sær tað út til at fleiri eru førdir henda vegin við vindinum.
Silas sigur, at í Mykinesi og í Trongisvági eru nátthegrar sæddir, og eisini eru fleiri fráboðanir um nátthegra í Hetlandi og ein á Ytri Suðuroyggjum (Hebridunum).
Virkin í myrkri
Sum tað liggur í heitinum, so leitar nátthegri sær mest eftir føði í skýmingini ella á nátt, í veitum og grunnum vatni. Um dagin hvílir hann seg ofta í trøum, har hann kann vera rættiliga trupul at finna, um hann ikki knappliga fer á flog.
- Nátthegri er sera sjáldsamur ferðagestur í Føroyum. Eygleiðingin í Hvalvík er bert sætta skráseting í Føroyum. Nærmastu búpláss eru í Miðevropa, sigur Silas.
Silvurhegri avmyndaður við Gróthúsvatn (Mynd: Silas OIofson)
Sá eisini ein silvurhegra
Silas var eisini ein túr í Sandoynni, tí har var ein fráboðan um ein silvurhegra (Ardea alba), sum var sæddur í norðurendanum á Sandsvatni. Silas fann silvurhegran við Gróthúsvatn.
- Hann fiskaði dúgliga, og væl lá fyri, greiðir Silas frá.
Silvurhegri er ein stórur hvítur hegri á stødd við gráhegra (hegra). Hann eigur so langt norður sum Danmark, men er vanligari í Suðurevropa. Hann er sera sjáldsamur í Føroyum, og hetta er bert fjórða skráseting herheima.
Lurta eftir samrøðuni við Silas Olofson.
Fakta um nátt- og silvurhegra
Nátthegri í viðarlundini í Hvalvík (Mynd: Silas Olofson)
Nátthegri
Longd: 58 – 65 cm
Flog: 90 - 100 cm
Búpláss: Eigur í Norður- og Suðuramerika, Evropa, Asia og Afrika.
Vetrarvist: Norðastu stovnarnir ferðast suðureftir vetri.
Atburður: Eigur í bølum, ofta í trøum nærindis vatni. Nátthegri leitar sær fyri tað mesta føði um náttina og er ógvuliga ráksnúgvin. Hann tekur skordýr, bæði á vatni og á landi, fiskar, froskdýr, tvískeljar, fuglar, egg, smá sugdjór, plantutilfar, rusk og annars, tað sum fyri er.
Skrásetingar: Sera sáldsamur ferðagestur. Áður bert skrásettur fýra ferðir í Føroyum, 1870, 1990, 1992, 2011 og nú aftur í 2023.
Kelda: Fuglar í Føroyum.
Silvurhegri í Gróthúsvatnið (Mynd: Silas Olofson)
Silvurhegri
Longd: 55 – 65 cm
Flog: 88 – 106 cm
Búpláss: Eigur í Afrika, Asia, Avstralia og Mið- og Suðurevropa og hevur breitt seg norðureftir í Evropa seinastu árini.
Vetrarvist: Norðastu stovnarnir ferðast suðureftir á vetri
Atburður: Eigur í bølum, tætt við vøtn og vátlendi. Etur skordýr og ormverur, rækjur, krabbar og krabbadýr umframt smáar fiskar.
Kelda: Fuglar í Føroyum.