Tá ið tú fert inn í Blákrossbúðina í miðbýnum, kanst tú snara til vinstru. 

Um tú fert oman gjøgnum trappurnar, kemur tú til tað nýggja ungdómshølið, Hollywood. Har er litríkt og fagurt. Diskokúlur hanga uppi undir loftinum sum tríggjar heingikoyggjur. Eisini er ein barr, sum ikki er sum aðrar - hon er rúsfrí. Tað er Liv Lívið, sum stendur fyri hesum.

Lív Brúsá, ið er starvsfólkaumboð fyri Liv Lívið og sálarfrøðingur hjá Bláa Krossi, sigur, at eitt stað sum Hollywood hevur manglað í Føroyum.

- Eg vóni, at barrin kann elva til kjak. Ein noyðist ikki at drekka fyri at hava tað stuttligt, sigur Lív.

Hon greiðir eisini frá, at tey, sum ikki drekka, uppliva mangan, at fólk kunnu vera óhóskandi og spyrjandi, tá ið tey eru á festivalum, tí tey ikki drekka.

Ætlanin við Hollywood er at hava eitt stað til ung, har tey kunnu savnast, spæla borðspøl, práta og hugna sær saman - uttan rúsdrekka.

Tey ungu lata væl at

Askur Magnason og Sjúrður Højsted arbeiða í barrini og plaga at vera í Hollywood, har teir mangan gera heimaarbeiði og eru saman við vinum.

- Vit hava manglað eitt tílíkt stað fyri ung, eru teir samdir um.