- Tíðindi, mentan og ítróttur
Góðan morgun Føroyar
Tað er ymiskt, nær í syklussinum kvinnukroppurin orkar best ávísa venjing. Rósa Egholm er persónligur venjari og hevur síðuna Real Raw Rosa.
Har leggur hon dent á venjing og kvinnukroppin. Hon vil varpa ljós á, hvussu nógv syklussurin ávirkar venjingina, og hvussu kvinnur kunnu brúka syklussin til sín fyrimun í venjing.
Hormonjavnvágin broytist frá viku til viku
Frá fyrsta menstruatiónsdegi til eggloysnina, sum er umleið helvtin av syklussinum, hava kvinnur minni hormonframleiðslu. Tá orkar tær ofta betur at venja við tyngri vektum og við hægri styrki.
Frá eggloysnini til menstruatiónin kemur aftur, er hormonframleiðslan stór, og tá orka kvinnur ofta ikki at venja við somu styrki. Tó so, er ymiskt, hvussu kvinnur hava tað gjøgnum syklussin, og onkrar orka minni júst teir dagarnar, menstruatiónin varir. Hetta kemst millum annað av, at lívmóðurin er størri og tyngri tá, og orkan kann vera minni.
Rósa hevur eisini kvinnusjúkuna PCOS
Kvinnusjúkan PCOS rakar eggjastokkarnar. Hetta ávirkar millum annað hormonjavnvágina, syklussin, menstruatión og fruktbarheit.
Hetta hevur ávirkað Rósu nógv, og tí hevur hon serligan áhuga fyri, hvussu kvinnur kunnu leggja sær venjingina til rættis eftir syklussinum.
- Onkrar dagar orki eg væl og aðrar illa. Tá er gott at vita, hví tað er soleiðis, sigur Rósa.
Tað er ymiskt, hvussu menstruatión, hormon og eggloysn ávirka kvinnur, men Rósa mælir til at skriva niður, hvussu gongdin er ein mánað. Hvat ein orkar og nær, so ein kann brúka sín sykluss til sín fyrimun.