- Støðan er tann, at tað er torført hjá nógvum foreldrum í dag, at seta seg inn í gerandisdagin hjá børnum, sum er so merktur av interneti og tøkni. Tí foreldrini kenna jú ikki til tað frá sínum egna barndómi.

Soleiðis sigur Kala Rajani Hansen, sum er heilsufrøðingur.

Sambært henni er foreldrauppgávan nógv broytt, síðani tøknin og ikki minst internetið veruliga komu inn í gerandisdagin hjá barnafamiljum.

- Longu tá tú gerst foreldur, mást tú gera tær nakrar tankar um, hvussu tit í familjuni skulu brúka tøkni. Hugsa um, hvussu tú brúkar eitt nú teldil ella telefon, tá tú ert saman við barninum, tí barnið lærir av tí, sum tey vaksnu gera, sigur Kala Rajani Hansen.

Hon heldur ikki, at børn undir trý ár eiga at sita við eitt nú teldli ella spæla við eina fartelefon.

- Í hasum aldrinum skulu tey kunnu føla, smakka og veruliga síggja og uppliva tingini. Og tað gera tey ikki, um tey uppliva alt á einum skíggja. Heldur ikki mennast tey kroppsliga, tá tey "spæla" á einum skermi, heldur heilsufrøðingurin fyri.

Í morgunsendingini fortaldi Kala Rajani Hansen um foreldur at børnum, sum liva í eini verð, har ymisk tøkni er so stórur partur av teirra gerandisdegi, og hvussu hetta ávirkar foreldrauppgávuna.