- Tíðindi, mentan og ítróttur
Góðan morgun Føroyar
Undir seinna heimskríggi búði føroyska familan í Dali í Vanløse. Tey vóru væl við jødisku Stohn hjúnini, sum áttu húsini, har familjan í Dali leigaði sína íbúð.
Men í 1943 herdist jagstranin eftir jødum í Danmark, og Stohn hjúnini noyddust at flýggja frá degi til dags.
Føroyska familjan tók yngra sonin hjá teimum, Carsten Stohn, til sín. Hann var bara sjey mánaðir.
Trillaði fram við týskum hermanni
Dóttirin í føroyska húskinum, Unnur í Dali, var fýra ár um hetta mundið, og hon minnist væl, at hon plagdi at trilla lítla, jødiska dreingin framvið einum týskum hermanni, ið stóð beint uttan fyri teirra dyr.
Carsten Stohn fekk nýtt navnabræv og navnið Richard í Dali, og hann var hjá føroyskum familjuni í einar tríggjar mánaðir. Tá slapp hann til Svøríkis at vera saman við familju síni aftur.
Mong ár eru liðin uttan nakað samband millum tey bæði Unnur og Carsten, men í summar hittust tey aftur.
Kannar, hvussu føroyingar hjálptu
Søgan um familjuna í Dali er bert ein av fleiri, sum eru komnar undan kavi, eftir at Maigun Solmunde fyri einum ári síðani fór undir at kanna leiklutrin hjá føroyingum at bjarga jødum undir krígnum.
Hetta kanningararbeiðið er framvegis ígongd, og fleiri hugtakandi søgur eru komnar undan kavi um føroyingar, sum settu lívið í vága fyri at hjálpa jødum í Danmark at flýggja til Svøríkis.