Boris Johnson nýggjur forsætisráðharri í Bretlandi

55 ára gamli Boris Johnson, ið er útbúgvin søgufrøðingur, og sum fyrr hevur verið borgarastjóri í London, verður nýggjur forsætisráðharri í Bretlandi.

Tað er greitt, eftir at atkvøðurnar til formansvalið hjá Konservativa flokkinum eru taldar upp.

Boris Johnson vann greitt á Jeremy Hunt, sum eisini stillaði upp til formansvalið. Boris Johnson fekk 92.153 atkvøður, Jeremy Hunt fekk 46.656 atkvøður.

 >> SÍ EISINI Vangamynd: Hvør er Boris?

Meiningakanningar vístu eisini undan valinum, at tað fór at verða Boris Johnson sum vann á Jeremy Hunt í stríðnum um formanssessin hjá Konservativa flokkinum.

Tað vóru teir 160.000 limirnir hjá Konservativa flokkinum í Bretlandi, sum gjørdu av, hvør tann nýggi floksformaðurin - og sostatt eisini forsætisráðharrin - verður.

Fleiri ráðharrar leggja frá sær

Samstundis, sum tað nú er greitt, at Boris Johnson tekur við eftir Theresa May, er somuleiðis greitt, at bretar eisini skulu hava fleiri nýggjar ráðharrar.

Undan formansvalinum hjá Konservativa flokkinum høvdu tríggir ráðharrar boðað frá, at teir fóru úr ráðharrasessunum, um Johnson vann valið.

Anne Milton, sum er ráðharri í undirvísingarmálum, boðaði fyri lítlari løtu síðani frá á Twitter, at hon gevst sum ráðharri, nú úrslitið av valinum í Konservativa flokkinum er greitt.