- Tíðindi, mentan og ítróttur
Lítið av toski á landgrunninum
Nógv hýsa, men ikki nógvur toskur. Soleiðis var støðan á føroyska landgrunninum, sambært Havstovuni.
Manningin umborð á Magnusi Heinasyni fekk nógva hýsu í trolið á landgrunninum, men nøgdin á toski var munandi minni enn um sama tíðarskeið í fjør. Ein orsøk til hetta kann vera, at toskurin var seinur á veg til gýting, og tí ikki hevði savnað seg enn á vanligu gýtingarøkjunum. Tað sigur Havstovan.
Toskurin, sum kom í trolið hjá Magnusi Heinasyni, var somuleiðis sera rak í mun til onnur ár. Helst tí at lítið av nebbasild hevur verið í longri tíð.
Havstovan gjørdi eisini vár-yvirlitstrolingar á Føroyabanka í mars mánaði. Tær bendu á, at har var toskurin við at koma fyri seg aftur. Søguliga lítil toskur hevur annars verið á Føroyabanka síðani 2006. Tí varð Føroyabanki friðaður fyri fiskiskap í 2009.
Tað er ein jalig gongd, at meira av toski aftur sæst á Føroyabanka, men Havstovan sigur, at fleiri kanningar skulu til áðrenn Føroyabanki verður latin uppaftur til fiskiskap.