Donald Trump aftur stevndur

Fyrrverandi amerikanski forsetin, Donald Trump, er aftur stevndur, hesa ferð fyri at siga ósatt. 

Fyrr í hesum mánaðinum var Trump dømdur sekur  fyri kynsligan harðskapi og ærumeiðing móti rithøvundinum, E. Jean Carroll. 

Hann skal rinda henni tilsamans 52 milliónir dollarar í endurgjaldi, avgjørdi nevningatingið í sivila rættarmálinum. 

Trump hevur kært dómin.

Nú hevur E. Jean Carroll víðkað stevningina í einum øðrum máli móti Trump, sum hevur verið í rættarskipanini síðani 2019.

Hon vil hava við í stevningina tað, sum Trump segði á veljarafundi 10.mai, dagin eftir at hann var dømdur. Har tók hann uppaftur, at hann ongantíð hevði hitt Carroll, og hann skuldsetti hana fyri at lúgva.

Hann skemtaði eisini um ákæruna, og segði m.a. at Carroll er garvill.

- Tað er háðan móti dóminum í nevningatinginum og móti rættarskipanini, at hann kann halda fram við at endurtaka somu ærumeiðandi útsagnir, sigur advokaturin hjá Carroll, Roberta Kaplan, í fráboðan.