Stevið var gott í síðsta dansinum

Max-Schmeling-Halle, Berlin (U21-heimsmeistaraheitini í hondbólti)
Føroyar - Kroatia, 31-27 (16-14)

Við Óla Mittún í miðdeplinum vann Føroyska U21-hondbóltslandsliðið sannførandi á Kroatia og tryggjaði sær samstundis 7. plássið í HM-kappingini í Týsklandi.

Gamaní varð Bjarni í Selvindi valdur til dagsins mann - hann spældi eisini ein góðan dyst - men eftir steðgin stýrdi snildi og snúni spælskiparin í stóran mun dystinum við gjøgnumbrotum, skotum og fríspælingum á høgum stigi.

Samanumtikið var stevið gott. Kroatia vann seg framum tíðliga, men føroyska álopsspælið riggaði sum heild væl, og tá verjan og Aleksandar Lacoc í føroyska málinum fingu betri tak á, vunnu Føroyar seg framum.

Størstu føroysku stjørnurnar, Elias á Skipagøtu og Hákun West av Teigum, sótu uttanfyri, og kundu hyggja at, meðan føroyska leiðslan vaks eftir steðgin. Nummar 71 kom á vøllin at skjóta brotskøst, men annars tóku millum annað Rói á Skipagøtu (5), Pauli Høj (4), Kristoffur Bjørgvin (4), Bogi Hansen (4) og Kristian Jensen(4) sær av málskjótingini. 

Óli Mittún var kortini stjørnan og stjórnaði spælinum, tá hann ikki var mansvardur. Kroatia nærkaðist einaferð, men Føroyar settu ferðina upp, og teljast nú millum sjey tær sterkastu hondbóltstjóðirnar í heiminum í U21-aldursbólkinum við monnum. 

Tað er í sjálvum sær ikki hissini, hóast dreymarnir eitt bil vóru uppaftur størri.

sp7_4618.jpg

Frítekst tagging: 

Ítróttur

Hondbóltur

Føroyar

U21-landsliðið