Guðstænastur í sjónvarpi

Guðstænasta úr Miðvágs kirkju
26-05-2022
Samkirkjudagar 2022

Samkirkju gudstænasta. Skapan – "skriftin á vegginum".

Kirkjuklokkan spælir

Præludium. Vágakórið

Inngangsbøn. Jóhannis Joensen

Sálmur 555 : Nú skínur sólin bjarta

Inngangskollekt. Jógvan Fríðriksson, bispur

Lestur: 1 Mós 2,4-9. Liz Jørgensen

Sangur. Magni Christiansen

Yrkingar, ( Chr Matras). Ria Tórgarð

Ein løta í kvirru...

Frelsunarherurin spælir

Lestur: Jes 40, 21-31. Lona Johansen

Trúarjáttan, ( í felag). Jógvan Fríðriksson

Sálmur 669 : Tann heimur, Harrin skapað hevur

Prædika. Jógvan Fríðriksson, bispur

Sálmur 25 : Upp alt, ið Harrin hevur gjørt

 

Útgangskollekt. Tummas Jacobsen

Aronitiska signingin. Tummas Jacobsen

Sálmur: ”Boðar tú til allar tjóðir ”. Sámal Ravnsfjall

Útgangsbøn. Jóhannis Joensen

Faðirvár, (í felag)

Klokkuspæl

Postludium. Vágakórið

Sálmur 1 :Harra Guð, títt dýra navn  og æra

Inngangskollekt. Fólkakirkjan

Latið okkum øll biðja! Harra, vár Guð, himmalski faðir, tú, sum skapað hevur allar lutir, himmal og jørð, havið og alt, sum í teimum er, alt tað, sum livir og andar á foldum og í veldi tínum heldur øllum livandi og alheiminum uppi. Vit biðja teg, tú, sum hevur sett okkum at umsita náttúruna og allar gávur tínar, hjálp okkum at kenna ábyrgd fyri hvør øðrum og øllum skapanarverki tínum, so at vit umsita gávur tínar rætt, og ikki í sjálvsøkni, egingirnd og havisjúku misbrúka og oyðileggja tað, sum tú hevur skapað, men fara væl um náttúruna og umsita hana á skynsaman hátt til gagns fyri øll menniskju og alt livandi, djór og allan vøkstur fyri einborna son tín, Jesus Krist, váran harra, sum við tær livir og ræður í einleika heilaga andans, ein sannur Guð um aldur og ævir allar! Amen.

Lestur 1. Atventkirkjan

1 Mós 5-9

Tá ið Harrin Gud skapaði jørð og himin – men á vøllum jarðar var enn als eingin runnur til ; og ongar urtir vuksu enn á markini, av tí at Harrin Gud enn ikki hevði latið tað regna á jørðina, og eingir menn vóru til at dyrka jørðina; men upp úr jørðini kom kelda og vætaði alla markina – tá myndaði Harrin Gud mannin av mold jarðar og blásti lívsanda í nasar hans, og soleiðis varð maður til livandi skepnu.

Síðan plantaði Harrin Gud aldingarð í Eden í eysturlandi; og har setti hann mannin, sum hann hevði myndað.

Og Harrin Gud læt úr dyrkilendinum spretta upp alskyns trø, frálík á at líta og góð til matna og í miðjum aldingarði lívsins træ og træ kunnleikans um gott og ilt

Amen

Yrkingar ( Chr Matras) Fólkakirkjan

Náttúran

Eg legði oyrað ov nær inn at tær

Og hoyrdi tað, sum eingin visti var

Tí fekk eg aldri frið, tú elti meg

Og baðst í úrtíð meg at loysa teg

 

Tí vart ein megintægr í míni sál

Tó fáur hevði enn tær givið mál

- Myrkursduni – ella skróv í strá –

- mjúkum bug, sum bygdir hvílast á.

 

Eg kendi ofta í mær rúmdargos

Í ómegd pipraðist sum minsta bros

Tá aftur harðnaði mær eitt lag

Sum tú mær árla inn í oyra kvað

 

Mest sum tú rakst meg tá fram eftir rás

Til bjargamóti setti fyri lás

Og rendi skjálvta gjøgnum merg og blóð

Við sínum vegloysi hátt yvir sjó

 

Fátækt er mansins hjarta

Fátækt er mansins hjarta

Ørm er hans gonguferð

Kennir tú tó í løtum

Máttin ið heimin ber.

Kemur sum glottar av ljósi

Ið óvart nema við jørð

Er sum ein songur í oyrum

Frá øllum á foldum grør

Latum okkum standa eina løtu í kvirru....

Lestur 2. Fríkirkjan, Vegurin

Jesaja 40, 9 og 21-23 og 25-31

Gakk tær niðan á hægsta fjall, tú, sum bert Zion gleðiboð; rópa av kraft, tú gleðiboðari Jerúsalems; rópa ekkaleysur, sig við Júdaborgir:” Sí Gud tykkara...

Vita tit ikki, og hava tit ikki hoyrt tað, hevur tað ikki verið tykkum kunngjørt frá upphavi, og hava tit ikki havt kunnleika um tað, síðan jarðarinnar grundvøllum varð lagdur?

Tað er hann, ið situr hátt yvir jarðarkringinum, og teir, sum har búgva, eru sum ongsprettur; tað er hann, ið tenur út himinin eins og dúk og breiðir hann út eins og tjald til at búgva undir.

Hann ger høvdingar at ongum og jarðarinnar dómarar at fáfongd..

Við hvønn vilja tit sambera meg sum javnlíka mín, sigur hin heilagi.

Líti upp móti himni og síggi: Hvør skapaði hesar? ( stjørnurnar) Hann sum eftir tali leiðir her teirra fram og nevnir tær allar at navni, mikil í megi og veldismátti, so at eingin teirra vantar.

Hví talar tú svá, Jákup, og Ísrael, hví sigur tú hetta: “Vegur mín er fjaldur fyri Harranum, og rættur mín er gloppin Gudi úr mínum hondum”

Veitst tú tá ikki, hevur tú ikki hoyrt tað, at ævigur Gud er Harrin, ið skapað hevur ta víðu jørð? Hann møðist ikki og lúgvast ikki, órannsakandi er vísdómur hans

Hann gevur hinum maktaða megi og hinum máttleysa mikla styrki; ungmenni møðast og maktast, og unglingar níga; men teir, ið vóna á Harran, fáa kraft av nýggjum; teir renna og ikki møðast og ganga og ikki maktast

Amen

Kirkjubøn – skapanarsunnudag. ( Útgangskollekt áðrenn Aronitisku signingina.) Hvítusunnusamkoman

Latið okkum øll biðja!

Guð – faðir, sonur og heilagi andi,

skapari, loysnari og lívgevi!

Tú, sum hevur skapt heimin og okkum

og alt fjølbroytni í skaparaverkinum,

tær takka vit fyri handaverk títt,

fyri vakurleikan og alt tað undrunarverda

fyri góðsku og gávumildni títt,

og teg biðja vit fyrigeva alt tað, vit røkka ov stutt við:

Vit viðganga, at vit ikki hava virt gávur tínar,

sum vit áttu.

At vit í sjálvsøkni og við løtuvinningi fyri eyga

hava oytt og dálkað land og luft og hav.

Fyrigev okkum.

 

Vit takka tær fyri,

at tú gavst okkum menniskjum forvitni,

evni og hegni til at grunda yvir og granska

tilveruna og skaparaverkið.

Takk fyri gávur, hegni og vilja

til at grøða og linna sjúkur,

takk fyri innlit í góða og ringa ávirkan á skaparaverkið, í lívi menniskjunnar,

í lívinum á jørðini, í sjónum og í luftini

og hjálp okkum at brúka innlitið eftir tínum vilja.

 

Takk fyri allar teir batar,

vit eru før fyri at hjálpa illa støddum við.

Takk fyri alla framgongd í vitsku, og hjálp okkum,

at hon eisini verður til framgongd í vísdómi.

Takk fyri allar tær eldsálir, sum ikki spara seg sjálvar,

men sum ganga tíni ørindi,

samanhaldinum og fjøldini til gagns.

Hjálp okkum at søkja tað gagnliga

og gev okkum fyrilit,

so at vit eisini varnast okkara mørk.

 

Vit biðja teg fyri landi okkara,

fyri hvørjum heimi, hvørjum stovni og hvørjum einstøkum:

Ver tú hjá okkum við tínum góða anda.

Vit biðja teg fyri okkara børnum, at tey mega mennast í tryggum korum og kærleika.

Fyri okkara ungu,

at vit ikki kroysta tey at ganga okkara leiðir,

men at vit mega duga at stuðla teimum í

at menna sín egna samleika.

Fyri okkum tilkomnu og eldru, at vit ikki lata okkara part liggja eftir.

 

Vit biðja teg fyri øllum, sum hava makt og ávirkan,

lat tín anda vegleiða tey til alt, sum er rætt og gott.

Ver við drotning okkara, løgtingi, landsstýri

og øllum, sum í stórum og smáum taka avgerðir,

sum røkka inn í lívið hjá øðrum,

at alt má verða næsta okkara og skaparaverkinum til gagns og uppbyggingar.

 

Ver hjá øllum teimum,

sum stúra og stríðast við tungar spurningar,

øllum, sum syrgja og øllum,

sum kenna seg einsamøll og sett til viks.

Lat eygu tína hvíla, har okkara fara framvið,

steðga okkum, tá vit skunda okkum ov nógv,

styðja okkum, tá vit snáva, reis okkum, tá vit eru fallin

og koyr undir okkum, tá vit eru uppgevandi.

Hjálp okkum í orði og verki at játta tað góða

og at avnokta tað illa.

 

Ver hjá landsmonnum okkara á sjónum og úti í heimi.

Vit biðja teg fyri øllum heiminum,

læn oyrað til teirra, sum pínast og gráta

stuðla øllum, sum ganga friðar- og rættvísis-ørindi,

og steðga teimum, sum eru atvold til kríggj og neyð.

 

Ver við kirkju tíni her hjá okkum og um allan heimin.

Lat dyr hennara verða víðopnar fyri kærleika og samanhaldi millum øll børn tíni,

og stong tær fyri dømisjúku og mismunum.

Gev okkum øllum lívsmót

við tínum orði og sakramentum

til eisini at tala at órætti og vanvirðing av skaparaverkinum

og drag okkum aftur til tín, tá vit fara av leið.

 

Tað biðja vit øll í Jesu navni!

Amen

Guðstænastur í sjónvarpi

Sjónvarpið sendir møti og gudstænastur frá ymsum samkomum í Føroyum hvønn sunnudag klokkan 16:00.

- Tummas Kannuberg, prestur, prædikar
10-03-2024
- Theodor E. D. Olsen, prestur, prædikar
18-02-2024
- Marjun Lómaklett, prestur, prædikar
11-02-2024
- Øssur Kjølbro, prestur, prædikar
04-02-2024
- Maria Jørðdal Niclasen, prestur, prædikar
28-01-2024
- Steintóra Gleðisheygg Joensen, prestur, prædikar, tekstað
22-01-2024
Nýggjársguðstænasta í Sands kirkju 2023
31-12-2023