- Mær hevur altíð dámað væl bæði John Mogensen og Kim Larsen, sigur Herborg Torkilsdóttir. Ikki minst tekstirnir eru góðir, leggur hon aftrat.

Nú koma fimm sangir í akustiskum útgávum. Så længe jeg lever verður ofta sungin í veitsluhøpi, men í veruleikanum er hetta ein rættiliga vakur og sorgblíður sangur, vísir Herborg á.

Eitt annað, ið hugtekur hana við teirra sangum, er skemt og tað gerandisliga. Nakað, ið eisini sæst aftur í sangunum hjá Herborg.

Hon hevur spælt fleiri konsertir í Danmark og verður eisini spæld javnan í donskum útvarpi. Hetta er haraftrat ein máti at røkja donsku fjeppararnir, ásannar føroyski sangfuglurin.

Rakul Petersen er eisini við í studio 5. Hon er framúr gittaristur og syngur somuleiðis kór.

- Rakul dugir væl at hála meg niður aftur, tá eg havi hug at fara á flog, sigur Herborg.

- Tað var serliga í fyrstuni, at tað onkuntíð var brúk fyri tí, sigur Rakul brosandi.

Í studio 5 hesa ferð hoyra vit tríggjar endurútgávur. Dengang da jeg var lille hjá Kim Larsen, Lívið hjá Nicolinu av Kamarinum og Så længe jeg lever hjá John Mogensen.