Samgongan er komin við sínum útspælið um hvussu tilfeingisgjøldini í fiskivinnuni skulu endurskoðast.

Í uppskotinum stendur, at endamálið er, at ein munandi, men rímiligur partur av tí serstaka vinninginum - tilfeingisrentuni - sum vinnulig serrættindi kunnu hava við sær, falla til landið. 

Uppskotið
Við uppskotinum hækka tilfeingisgjøldini á botnfiski úr Barentshavinum og á makreli. Og sum nakað nýtt verður veiðugjald lagt á makrel hjá heimaflotanum, á lodnu og heystgýtandi sild, sum uppsjóvarskipini eisini fiska.

Sambært uppskotinum um broytingar í veiðigjøldunum hjá fiskivinnuni hækkar gjaldið á makreli við 23 oyrum. Úr 1 krónu og 23 oyru fyri kilo upp í 1 krónu og 46 oyru fyri kilo.

Fyri botnfisk úr Barentshavinum hækkar gjaldið úr 1 krónu og 8 oyru upp í 2 krónur og 16 oyru - og veiðigjaldið á lodnu og heystgýtandi sild verður ávikavist 98 oyru og 89 oyru.

Veiðigjaldið fyri svartkjaft og norðhavssild hækkar ikki. Tað verður framvegis 31 oyru og 89 oyru.

Táttar í 100 milliónir
Í lógaruppskotinum stendir at Landsstýrið væntar, at árliga meirinntøkan frá veiðigjøldum verður millum 70-100 milliónir krónur, meðan tað í dag koma umleið 340 milliónir krónur inn í tilfeingsgjøldum og 60 milliónir krónur í uppboðssølugjøldum.

Í sendingini hoyra við Ruth Vang, landsstýriskvinnu í fíggjarmálum, greiða frá uppskotinum og hví samgongan ikki tekur meira inn í veiðigjøldum, Hans Ellefsen, búskaparfrøðing, sum metir at øll tilfeingsrentan skuldi fallið til landið, Stefan í Skorini, formann í Reiðarafelagnum um áskoðanirnar hjá vinnuni, og at enda er politisk kjak millum limir í løgtingsins fíggjarnevnd um uppskotið.

Gestir: Ruth Vang, landsstýriskvinna í fíggjarmálum, Hans Ellefsen, búskaparfrøðingur, Stefan í Skorini, stjóri í Reiðarafelagnum, Beinir Johannesen, formaður í Fólkaflokkinum, Eyðgunn Samuelsen, tingkvinna fyri Javnaðarflokkin og forkvinna í løgtingsins fíggjarnevnd, Magnus Rasmussen, tingmaður fyri Sambandsflokkin, og Eirikur í Jákupsstovu, tingmaður fyri Tjóðveldi. 

Gjørt sendingina hava Tróndur Olsen og Marjun Dalsgaard, sum eisini var redaktørur.