Talan var um triðju ferð, at útvarpssendingin, Café Salt, varð send úr søguliga Menatanarhúsinum á Drelnesi, Tvøroyri. Nógv fólk vóru komin á gátt at hoyra Sonna Smith greiða frá sínum lívi og at hoyra Froðbiar Sóknar Blues Orkestur spæla. Men har vóru eisini aðrir samrøðugestir og undirhaldarar: Halltóra Joensen, Sumbiar Bygdaráð, og Gunnhild Mortensen, Hvalbiar Bygdaráð, søgdu frá ymisku áskoðan sínum um kommunusamanlegging. Trý ungfólk úr Havn, Jóni, Hanna, og Bjarni greiddu frá stóra trivnaðinum á Ítróttarháskúlanum í Suðuroy, sum er í Vági. Niels Petur Nolsøe og Arnfinnur Thomassen sungu tveir tættir; annar var um Pizzamálið í Runavík, hitt var um leysasøgur í oynni. Kirkjukórið ljómur sang tveir sangir. Gundur og Arni Johansen frá Suðuroyar Sjónleikarfelag gjørdu eina parodi uppá sandvíkingar, har bland kom í millum konuna og ærina hjá øðrum teirra, ja, hetta var eitt kvøld í Salt til gaman og álvara. Haraftrat ringdi KvF-tíðindamaðurin til Grillbúðina hjá Símuni og á seyðarætt í Hvalba at fregnast um undirtøkuna fyri at leggja Suðuroynna saman í eina kommunu.

Sendingin kallast 'Café Salt' eftir kaffistovuni í Mentanarhúsinum Salt á Drelnesi. Við sínum góða ljóði og frálíka sýni yvir á Tvøroyri er hon eisini serstøk.
 

Café Salt 3 tann 1. mars 2023. Kringvarp Føroya og Radio Salt skipa fyri.

Vertir: Ólavur Rasmussen og Jákup Magnussen.