Meðan Todi var í útvarpinum, tók Poulina sær av øllum á Kafé Tvørá. Men klaksvíkingurin Todi var ikki einsamallur kortini. Tvøramaðurin Einar Larsen, Einar tollarin kallaður, var eisini komin á gátt á Drelnesi at siga honum eina stuttliga søgu um abba hansara, sum Todi var uppkallaður eftir, men ongantíð hevði kent. Í trýatiárunum var gamli Todi Jónsson á Tvøroyri at læra til skómakara, har hann eisini spældi til dans sum hornblásari. Har gjørdi hann eitt kvøldið avtalu við gentu, um at hittast aftaná dansin, men gentan sveik hann. Tað er beinleiðis orsøkin til, at í dag er táverandi hornið hjá gamla Toda á Tvøroyrar bygda- og sjóvinnusavni.

Men høvið til hesa samrøðu tann 30. september '26 var mest Kafé Tvørá. Ongin hevði nakrantíð ímyndað sær, at tann navnframi Todi Jónsson búsettist á Tvøroyri at reka kaffi- og matstovu. Todi greiðir frá grundini til hetta. Tað byrjaði sum leitan eftir summarhúsi fyri 5-6 árum síðan. Hann kendi seg væl á Tvøroyri, sum so aftur leiddi til, at hann í samstarvi við Mortan Vang, stjóra í byggivinnuni, megnaði at stovna Kafé Tvørá, ið eisini hevur nógvan mat at selja fólki. Hann og Poulina hava havt opið í eina mánaða og lata sera væl at.