Í dag letur Son of Fortune fyrsta sangin av komandi útgávuni frá sær.

Is It Essential er heitið, og hann verður við á Voodoo Pop, ið kemur á marknaðin næsta ár.

Benjamin Petersen hevði havt ávíst samskifti um telduna við fólk í Nashville, men heldur enn at sita heima og skriva, valdi hann í januar at bóka sær eina ferð til Nashville.

Tað var ikki honum greitt, hvat fór at spyrjast burtur úr granskingarferðini, men komin til Nashville vísti tað seg skjótt, at fólk vóru ógvuliga fyrikomandi.

Hann knýtti fleiri tøtt sambond, og avtala varð gjørd um upptøku í Sputnik Sound.

Benjamin sigur, at hetta ikki minst er øðrum føroyingum fyri at takka.

Jákup Zachariassen og Tummas Justinussen hava gjørt sítt, og Teitur Lassen hevur eisini spælt nógv har um leiðir.

Alt hetta ger, at tað er lættari at banka á tær røttu hurðarnar.

Maðurin aftanfyri Son of Fortune, sigur, at hetta ætlandi bara er byrjanin upp á nakað, ið fer at halda fram.

- Eg vóni at sleppa aftur til Nashville næsta ár, sigur Benjamin Petersen, ið nú gleðir seg til, at onnur eisini sleppa at hoyra tilfarið, sum er tikið upp.