- Nógv er hent í matvøruframleiðsluni seinastu árini; ikki minst tí at kundin krevur, at vørurnar eru burðardyggar, og sjálvt um vit ikki hava eina føroyska vistfrøðisgóðkenning, so hugsa vit hetta inn í okkara virksemi, sigur Sigert Patursson, formaður í bóndafelagnum.

Tað snýr seg um at hittast, kjakast og sparra, tá ið fólk við áhuga fyri burðardygd og sjálvbjargni í føroyskari matvøruframleiðslu hittast til ráðstevnu fríggjadagin og leygardagin. 

- Matsjálvbjargni er eitt hugtak, sum veruliga hevur vunnið frama seinastu árini. Fyrst orsakað av korona, og nú eisini orsakað av kríggi. Man skal hugsa um tað sum eina prosess, har vit gerast betri til at framleiða tað, okkum tørvar her heima, sjálvt um vit sjálvandi eisini fara at innflyta úr øðrum londum. Vit skulu bara gerast meira mótstøðufør, tá kreppur raka, sigur Elisabeth Skarðhamar Olsen, sum er ein av fyrireikarunum.