Men er gentukamarið eitt goymistað? Eitt bíðirúm ella verndarrúm? Ein fongsulsklivi ella ein skotgrøv?

Hetta er karmurin um søguna hjá Marjuni Syderbø Kjelnæs í nýskrivaða leiki hennara, Gentukamarið, sum í hesum døgum verður sýndur á Tjóðpallinum.

Gentukamarið

Gentan, í gentukamarnum, saman við veruni" (Mynd: Finnur Justinussen/Tjóðpallur Føroya)

Viðger viðkomandi lívsins spurningar
Umframt at vera ein søga um eitt kollsiglt hjúnalag, eina uppgerð við fortíðina, og leitanina eftir tryggleika, viðger leikurin eisini grundleggjandi og viðkomandi spurningar um kynssamleika og broytta leiklutin hjá kvinnum og monnum í dagsins samfelag.

Marjun Syderbø Kjelnæs hevur áður roynt seg sum leikritahøvund, og sýndi Tjóðpallurin í 2014 væl umtókta leik hennara, Tóm rúm, ið snýr seg um familjuna og rúmini í húsinum, og um at missa og koma til sættis við missin og framtíðina.

Marjun Syderbo Kjælnes

Marjun Syderbø Kjældnes hevur skrivað leikin (Mynd: Finnur Justinussen/Tjóðpallur Føroya)

Rúmið er afturvendandi hjá Marjuni

Í 2020 stílaði Tjóðpallurin fyri eini serstakari verkætlan, har høvundar, leikarar og leikstjórar framleiddu sokallaðar koronologar á palli og á filmi, og skrivaði Marjun í hesum sambandi tveir av koronologunum, ið kallaðust: Kassabilurin og Dukkuvognurin.

Afturvendandi tema í leikverkunum hjá Marjuni Syderbø Kjelnæs er rúmið, og tann týdningur og ávirkan rúmið og tingini í hesum rúmi, hava, og setur hetta eisini sín stóra dám á nýggja leikverk hennara.

Videobrot frá fyrireikingunum til Gentukamarið (Kelda: Tjóðpallur Føroya)

Leikstjóri er danska Anne Zacho Søgaard, sum nevnir leikin eitt "popp horror dreymaspæl" - tí eins og hjá Strindberg verða tey mongu løgini í søguni flættað saman á pallinum í eini samanrenning av sjangrum frá horror og drag til skemt og poesi.

Marjun Syderbø Kjælnes hevur skrivað leikin, og atgongumerki kunnu keypast HER

Kelda: Tjóðpallur Føroya