Í panelinum eru Beate Emilie Lindenskov Samuelsen og Siri Súsonnudóttir Hansen.

Tær tosaðu um tvey evni, ið hava verið nógv umrøtt í vikuni.

Landsstýrið fer nú í hernað ímóti royking, og ymisk átøk skulu setast í verk. Um hetta evnið, eru tær báðar ósamdar.

Beate heldur, at tað er keðiligt, at mann heldur áfram við, at leggja seg eftir roykjarunum. Tað er eitt persónligt frælsi at roykja, og hevur mann hug, so skal mann sleppa tað uttan at skamma seg.

Siri tekur undir við, at tað er keðiligt, at mann setur tey í bás, men hóast tað sigur hon, at eftirsum tað er skaðiligt, so er tað gott við onkrum átaki.

- Í staðin at tosa um príshækkingar og annað, so burdi mann heldur veitt teimum, ið vilja at leggja av, góða hjálp.

Annað evnið snýr seg um ferðafólkini, sum komu til Mykinesar. Tey gjørdust kløkk, tá ið tey skuldu rinda 500 kr, sum tey ikki vóru upplýst um.

Báðar siga, at tað er sera óheppið, at mann frá degi til dags broytir reglurnar. Men leggja afturat, at tað er vanligt at gjalda, tá ið mann ferðast, men júst hetta málið má betrast.