Í "Kultura" hesa ferð práta vit við Karin Elsbudóttir, stjóra í Norðurbryggjuni og Sissal Kampmann, bókmentafrøðing og lim í umboðsráðnum hjá Norðurbryggjuni, um heystskránna hjá Norðurbryggjuni, um hvønn leiklut og týdning Norðurbryggjan hevur fyri føroyska list, og so umrøða vit eisini evnini kolonialismu og ríkisfelagsskap. Tí seinastu tíðina hevur Norðurbryggjan havt fleiri tiltøk á skránni, ið varpa ljós á hesi evni - serliga úr einum grønlendskum sjónarhorni.

Eisini fara vit ein túr oman í Perluna í Havn, har Det Ferösche Compagnie setir nýskrivaða og altjóða virðislønta leikin Prima Facie upp. Frumsýning er 13. september.

Leikurin er skrivaður av australska rithøvudinum og fyrrverandi sakføraranum Suzie Miller, og snýr seg um Tessu; ein dugnaligan sakførara úr arbeiðaraklassanum, sum missur trúnna á rættarskipanina, tá hon sjálv verður fyri kynsligum harðskapi. Talan er um einkvinnuleik við Kristina Sørensen Ougaard í høvuðsleiklutinum, og leikstjóri er bretski Matthew Richardson. Dánjal á Neystabø er tónasmiður og Sámal Blak er sniðgevi. Beinir Bergsson hevur týtt leikin til føroyskt. Det Ferösche Compagnie hevur í samband við at fyrireika leikin samskift og samstarvað við Javnstøðunevndina, Sig Frá verkæltanina hjá Almanna- og mentamálaráðnum, Kvinnuhúsið og Neyðtøkutilbúgvingina í Sjúkrahúsverkinum. Vit tosa tí eisini við Eyðvør Tausen Olsen, leiðara í Kvinnuhúsinum og Brand Mortensen Nolsøe, samskipara í Javnstøðunevndini um leikin og álvarsligu evnini, ið hann varpar ljós á.