Í hesum parti av "Kultura" tosa vit við Karin Elsbudóttir, stjóra á Norðurbryggjuna í Keypmannahavn um verkætlanina "Tranhuset".

Tranhuset liggur við síðina av Norðurbryggjuni, og varð søguliga brúkt sum lýsigoymsla í samhandlinum millum Danmark og útnorður. Nú arbeiðir Norðurbryggjan við at umvæla og umbyggja søguliga bygningin til ein frálærudepil um Føroyar, Grønland og Ísland - serliga ætlaður donskum skúlabørnum.

Í sendingini fara vit eisini til Japan - ella til heimsframsýningina EXPO 2025. Tí í síðstu viku var ferðalið úr Føroyum við vinnulívsfólkum, listafólkum, politikarum og embætisfólkum á heimsframsýningini í Japan.

Føroyar var partur av norðurlendska skálanum, og vertur fyri Faroe Islands Days, ið vóru 4. og 5. september. Vit tosa við Oyvind av Skarði, fulltrúa í Uttanríkis- og vinnumálaráðnum og Sissal Kristiansen, stovnara og eigara av Shisa Brand um upplivingina.Vit spyrja hvat Føroyar og føroyskt lista- og vinnulív hevur fingið burturúr luttøkuni, og hvussu mann við list og mentan kann skapa (vinnulig)sambond við onnur lond.

Vit tosa eisini við Ásmund Guðjónsson skrivara í Norrønnufelagnum, sum leygardagin skipar fyri tiltakinum "Ísland, sum tað er"". Vit práta um tiltakið, og hví tað er týdningarmikið at føroyingar læra meira um Ísland og íslendingar.