Í hesi sending varpa vit ljós á ein nýskrivaðan føroyskan leik og eitt nýskrivað verk til symfoniorkestur.

4. oktober er frumframsførsla í Norðurlandahúsinum av einrøðuleikinum Upphav - í sambandi við norðurlendska pallistafestivalin VERK Nordic Stage Days
Leikurin tekur støði í sorgardegnum 1. apríl 1919, tá 11 menn úr Hesti sjólótust. Gunnvá Zachariasen, sum hevur ættarbond úr Hesti, hevur tikið stig til leikin, og hon skrivar, at leikurin er ein hugleiðing um smeitin hjá mínum formøðrum -mínum upphavi. Marita Dalsgaard er leikstjóri og hevur gjørt dramaturgiina, tónleikin hevur Anna Katrin Ø. Egilstrøð gjørt og ljóssniðið stendur Silje Grimstad fyri.

Vit fáa eisini Unn Patursson á gátt. Hon er fyrsta kvinna, ið hevur skrivað verk til symfoniorkestur. Verkið Útgreiningin verður frumframført leygardagin, tá Føroya Symfoniorkestur hevur sína Heystkonsert, og eisini verður konsert í Løkshøll sunnudagin. Unn Paturson hevur arbeitt við verkinum seinastu trý árini, og vit tosa við hana um verkið og tilgongdina.