Tað stóð nógv á sjúkrahúsverkinum, tá ið tað varð rakt av verkfalli í útvið sjey vikur. Felagið føroyskir sjúkrarøktarfrøðingar legði arbeiði niður, og støðan broyttist javnan við stuttari freist.

Eisini í aðrar mátar hava stórar avbjóðingar verið seinastu árini, eitt nú við eini koronufarsótt og einum toppmodernaðum H-bygningi, sum gjørdist væl dýrari enn nakar hevði væntað. Og samstundis skulu tey trý sjúkrahúsini fáast at virka sum ein heild, øllum at gagni.

Heilsuverkið er kanska okkara týdningarmesti stovnur í vælferðarsamfelagnum; tí verður tað javnan endavent á politiska pallinum, og innanhýsis eru sterkir fakbólkar við avgjørdum meiningum.

Mitt í hesum meldrinum stendur sjúkrahússtjórin, sum á fimta ári eitur Steinar Eirikstoft. Hann er bæði forstjóri fyri samlaða sjúkrahúsverkið og stjóri á Landssjúkrahúsinum, og hann hevur tilsamans eini 1400 fólk undir sær.

Steinar Eirikstoft er ársins nýggjársgestur. Vit tosa um bakgrund, avbjóðingar og framtíðarvánir.