- Tað er ótrúligt, hvussu nógv fólk venda sær til tín, tá ið slíkt er. Eisini fólk, tú ikki kennir. Tað er kanska tað góða í einum lítlum samfelag, men eg vildi heldur verið alt hitt fyriuttan.

Jenny Petersen hevur verið stjóri í Tjóðpalli Føroya í samfull 20 ár. Nú takkar hon fyri seg, og nýggjur stjóri tekur við tann 1. februar. Fýra ferðir eru hon vald aftur í tíðaravmarkaða starvið, sum hevur verið fimm ár í senn.

Hetta síðsta skeiðið hevur verið merkt av rumbli, tí ein listafylking boykottaði Tjóðpallin, og tey noktaðu at leika, so leingi Jenny Petersen var stjóri.

- Eg eri sjálvandi og særd, og tað hevur verið hart, men eg er komin forbí tað, tí eg føli, at so nógv hava stuðlað.

Jenny er komin víðari, men spurningurin er, um leiklistin er komin víðari.

- Vit hava eitt hús, sum skal byggjast, og eg trúgvi ikki, at slík ting byggja upp undir álitið at byggja eitt slíkt hús, so sjálvandi vóni eg, at leiklistin er komin víðari, sigur Jenny.

Í prátinum nýggjársdag verður komið inn á lívsleiðina og starvsleiðina hjá Jenny Petersen.

Jenny Christina Petersen hevur sama fornavn sum omman og mamman, og tey vuksu trý ættarlið upp undir somu lon. Sjónleikurin kom inn í hennara lív, longu tá hon var heilt ung, og hóast hon byrjaði at læra til grannskoðara, so gjørdist leiklistin hennara lívsstarv, bæði í Føroyum og Noregi.

Hoyr samrøðuna við Jenny Petersen, sum var nýggjársgestur ársins fyrsta dag í 2025.