- Tíðindi, mentan og ítróttur
Plátubarrin
Sjey av tilsamans átta løgum á 'Night Birds' heildarútgávuni verða spæld; okkurt er stytt. Men fyri at fáa enn betur innlit í áttatiára Shaktak, lata vit eisini onnur hitt hjá bólkinum ljóða. Umframt eitt rættiliga nýtt lag. Haraftrat viðmerkir guitaristurin, Leivur Thomsen, bólkin Shakatak, ið hann sum partur av Plúmm eisini spældi í áttatiárunum.
Á wikipedia stendur, at Nigel Wright og DJ Kev Roberts stovnaðu Shakatak, og síðani verður lopið fram í tíð. Men við at kanna aðrar heimildir ber til at stykkja søguna betri saman. Kev Roberts var sum DJ heitið sigur ikki ein tónleikari, men ein, ið gjørdi eitt stórt arbeiði fyri at bera soul-tónleikin fram millum bretar. Hann kom í samband við tað, sum skuldi blíva Shakatak, tí hann kendi teirra umboðsmann, Les McCutcheon, skrivar discogs.com. DJ Kev Roberts stovnaði sítt egna plátufelag, Destiny, har hann gav tónleik hjá Shakatak út, ella rættari fleiri nøvnum við Shakatak-tónleikarum, eitt var The Destiny Orchestra og annað var Tracks; Shakatak navnið var jú ikki veruleiki fyrr enn plátuhandilin, London Record Schack, sýndi teimum áhuga og gav íblástur til navnið.
Plátubarrin 29. apríl 2023
Plátubarrin
Plátubarrin er ein undirhaldssending við tónleiki í vetrarskrá Kringvarpsins. Sendingin er eisini interaktivt útvarp, og senditíðin er leygarkvøld frá klokkan 20:00 til klokkan 2:00.
Hvør sending byrjar við eini hugleiðing, ið byggir á eygleiðing av menniskjans atferð. Síðani verður Vertsins løta send til klokkan 20:45, tá tátturin Temaplátan fer frá, eins og annað tema er á skránni stutt fyri miðnátt.
Nærum tveir triðingar av Plátubarrini eru við lurtaraynskjum, ið sendast kunnu til nummar 224000, ella sum telduboð til facebooksíðuna, Plátubarrin.
Verturin, Jákup Magnussen, byrjaði at gera tónleikasendingar fyri Útvarp Føroya í 1982, og varð útbúgvin journalistur í 1993. Plátubarrin varð ljóðsett tann 16. februar í 2013.
