Vakri dalurin í Hoydølum, har Sanatoriið við øllum teimum tuberklasjúku fólkunum var, goymir nógvar tristar lagnur og stóra sorg. Higar komu tuberklasjúklingar úr øllum landinum fyri at fáa heilsubót, og tíbetur kláraðu nógv tað og komu út aftur til lívið. Men øll tey fyrstu árini var eingin heilivágur móti tuberklasjúkuni, og nógv kláraðu tað ikki og drógu seinastu ferð andan her - nógv í bestu árum. Her vóru nógvar syrgiligar søgur.

Í hesum fyrra partinum um Sanatoriið í Hoydølum verður tosað við 94 ára gomlu Dinnu Petersen á Glyvrum, ættað úr Fuglafirði, sum hevði tuberklar og var nógv á Sanatoriinum. Eisini verður tosað við Katrina Dahl, sjúkrasystir, sum ferðaðist kring landið við Magnussen, tuberklalækna, at koppseta allar føroyingar, og 84 ára gamla Símun Dalsgaard, sum vaks upp og hevur búð meginpartin av lívinum í Hoydølum, beint sunnanfyri Sanatoriið. Sum ungur lækni var Jón á Steig tuberklalækni eftir Dr. Magnussen og hesum greiðir hann frá í sendingini. Erland Viberg Joensen, savnsvørður á Tjóðsavninum, greiðir frá forkunnuga sanatoriibygninginum. Hann sigur, at bæði umhvørvið og dapra søgan gera Sanatoriið til nakað heilt serligt.