- Tíðindi, mentan og ítróttur
Málteigurin
Fyri stuttum brúkti Føroya løgmaður orðið, greidleiki, tá hann var spurdur um politisku støðuna, ið tá var nakað rokalig. Men er greidleiki eitt orð, siga vit ikki bara: fáa greiðu á, spyr lurtari.
- Orðið er sanniliga til, men tað ljóðar kortini snøggari at fáa greiði á ella greiðu á, sigur Elin Henriksen, málkøn.
Buksur eru fleirtal og kvennkyn
Lurtari sigur seg ofta síggja buksur umtalaðar í kallkynsformi, t.d. buksur til sølu, teir sita væl og hava nógv strekk.
Hesum visti Elin Henriksen ikki av og sigur, at tær eru kvennkyn: einar buksur, buksurnar tær. Brøkur eru eisini kvennkyn.
Vikuskifti og búrmáltíð
Á føroyskum eitur tað um vikuskiftið, og orðið, búrmáltíð, merkir stór og góð máltíð.
At noða
Lurtari hevur vent sær til okkara við nøkrum orðum við ymsum merkingum, sum eru áhugaverd at nevna, tí tey eru ikki so nógv at hoyra. Í dag er orðið: noða við merkingini at klinka.
Í sendingini hevur Elin Henriksen eina longri frágreiðing um orðið, noða, við merkingini at klinka, har hon tekur soleiðis samanum:
At noða er at kroysta ella sláa metal flatt. Eisini sagt, at 'loddið verður noðað av at knylla í klett á botni', at boyggja kant á metalplátu.
Vit hava eisini orðingina 'at vera noðin og snoðin'. Snoðin er at vera slætt, serliga sagt um t.d. seyð, sum hevur mist ullina, ella um tættklipt ella skallut fólk.
Og er okkurt so bæði 'noðið og snoðið', so er tað uppaftur slættari, sum væl pussað jarn.
At enda í sendingini verður mint á, at vit eru í masku ella brúka masku.
- Vit fara í masku, brillur og hatt, og vit eru í masku brillum og hatti. Vit taka ikki masku, brillur og hatt uppá.