Hvat er munurin á orðunum, átak og tiltak?

Her er talan um tvey ymisk orð, átak og tiltak, greiðir Elin Henriksen frá.

Orðið átak hevur tvær gamlar merkingar, ið neyvan verða nýttar longur:
1) at taka hart á, leggja nógva orku í, og
2) at hava vaml og spýggja. Og tá kann tað eisini eita 'átøk'.

Men tað er ivaleyst nýggjasta merkingin, talan her er um, fø-fø:
3 (ným.) miðvísar gerðir ið hava til endamáls at ávirka vitan, hugburð el. atburð hjá fólki (vanl. í stutta tíð) [da. kampagne];

- So ja, eitt átak er vanliga jaliga meint. Men alt eftir sjónarhorni kann eitt átak eisini vera neiligt, vísir Elin Henriksen á.

Eitt tiltak hevur nógvar ymiskar merkingar, harav tær vanligastu munnu vera hesar, fø-fø:
1) gerð ið setur e-t í gongd, vilja vit heita á landsstýrið um at seta í verk neyðug tiltøk
2) e-t ið fyriskipað verður (t.d. framsýning, sjónleikur, filmsýning, kapping)

Her er tað ivaleyst fyrru merkingini, vit skulu hava fatur á.

Tiltøk kunnu verða sett í verk bæði fyri at fremja eitthvørt og fyri at forða fyri onkrum. Slík tiltøk eru bundnari at lógum og reglum, enn átøk eru.
 

Undir Føroyum

Kunnu menn og kvinnur fiska undir Føroyum? Eg veit at hetta mangan verdur sagt, men nú eg hugsi - kennist tað at fiska undir Føroyum mær ógvuliga torført.

- Undir hevur so nógvar aðrar merkingar enn sum fyriseting, ið vil siga 'beint niðriundir', sigur Elin Henriksen.

Hoyri ofta 'hevði verið' vera brúkt ístaðin fyri var. Til tømis í tíðindunum í útvarpinum, tá ið verturin sigur, at viðkomandi hevði verið á tíðindafundi. Hví ikki bara: var á tíðindafundi?

Og hvussu eitur lýsingarskeltið, ið verður lagt ímillum innkeypið hjá ymsu kundunum.

Hesi eru nøkur av dagsins evnum í Málteiginum.